ຍີນ​ດີ​ຕ້ອນ​ຮັບ​ເຂົ້າ​ສູ່​ເວັບ​ໄຊ​ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ໜ່ວຍສະຫະພັນແມ່ຍິງ ພວຕ ແຂວງເປິດກອງ ປະຊຸມໃຫ່ຍຄັ້ງທີ I

1246ໃນຕອນບ່າຍຂອງວັນທີ 13 ພະຈິກ 2019 ຜ່ານມາ ນີ້,  ໜ່ວຍສະຫະພັນແມ່ຍິງ ພວ​ຕ ແຂວງ ໄດ້ເປິດ ກອງປະຊຸມໃຫ່ຍຄັ້ງທີ I ຂື້ນ, ເຊິ່ງໄດ້ຈັດຂຶ້ນທີ່ຫ້ອງ ປະຊຸມພະແນກວິ​ທະ​ຍາ​ສາດ ແລະ ເຕັກໂນໂລຊີ ແຂວງໂດຍ

ໃຫ້ກຽດເປັນປະທານກອງປະຊຸມຮ່ວມໃນຄັ້ງນີ້ມີ ສະຫາຍ ສຸລະພົນ ໝື່ນວິເສດ ເລຂາໜ່ວຍພັກຮາກຖານ ພະແນກ ວິທະຍາສາດ ແລະ ເຕັກໂນໂລຊີແຂວງ, ສະຫາຍ ນາງ ວິລະວັນ ດາລາສິນ ປະທານສະຫະພັນແມ່ຍິງ ແຂວງ ແລະ ສະຫາຍ ນາງ ດາວັນ ຜາງທະວົງ ຄະນະໜ່ວຍສະຫະພັນແມ່ຍິງ ພວຕ ແຂວງ, ມີທ່ານຕາງໜ້າຈາກ ຄະນະໜ່ວຍສະຫະພັນແມ່ຍິງພະແນກການອ້ອມຂ້າງແຂວງ, 3 ອົງການຈັດຕັ້ງມະຫາຊົນ ພ້ອມດ້ວຍສະຫາຍ ສະມາຊິກສະຫະພັນແມ່ຍິງພາຍໃນໜ່ວຍເຂົ້າຮ່ວມທັ​ງ​ໝົດ 20 ສະ​ຫາຍ, ຍິງ 13 ສະ​ຫາຍ.

  ໃນກອງປະຊຸມໃຫຍ່ຄັ້ງນີ້ ແມ່ນເພື່ອສະຫຼຸບຕີລາຄາສະພາບການຈັດຕັ້ງຊີ້ນຳ-ນຳພາຂອງໜ່ວຍສະຫະພັນແມ່ຍິງ ພວຕ ແຂວງ ໃນໄລຍະຜ່ານມາ ແລະ ວາງທິດທາງແຜນການຈັດຕັ້ງປະຕິບັດໃນຕໍ່ໜ້າ, ສະຫຼຸບຕີລາຄາ ການສຳຫຼວດ-ກວດກາ ການຊີ້ນຳ-ນຳພາຂອງໜ່ວຍສະຫະພັນ ແມ່ຍິງ ພວຕ ແຂວງ ແລະ ເພື່ອເລືອກຕັ້ງຄະນະໜ່ວຍສະຫະພັນແມ່ຍິງ ພວຕ ແຂວງ ໃນການສືບຕໍ່ຊີ້ນຳ-ນຳພາ ແນໃສ່ປະຕິບັດແຜນການຄາດໝາຍສູ້ຊົນ ໃຫ້ປະກົດຜົນເປັນຈິງ.

     ໂອກາດດັ່ງກ່າວ, ສະຫາຍນາງ ດາວັນ ຜາງທະວົງ ຄະນະໜ່ວຍສະຫະພັນແມ່ຍິງ ພວຕ ແຂວງ ໄດ້ຂຶ້ນຜ່ານບົດສະຫຼຸບຕີລາຄາການເຄື່ອນໄຫວວຽກງານຂອງໜ່ວຍ ໃນໄລຍະຜ່ານມາຊຶ່ງມີຜົນສຳເລັດ ໃນຫຼາຍດ້ານອັນເປັນການປະກອບສ່ວນເຂົ້າໃນວຽກງານວິຊາສະເພາະ ແລະ ການເຄື່ອນໄຫວໃນວຽກງານຂອງສະຫະພັນແມ່ຍິງ.

          ບົດສະຫຼຸບ ຍັງຍົກໃຫ້ເຫັນບາງຂໍ້ຄົງຄ້າງທີ່ຈະຕ້ອງໄດ້ສືບຕໍ່ແກ້ໄຂ ເພື່ອວາງຄາດໝາຍສູ້ຊົນໃນຕໍ່ໜ້າ ແລະ ສະເໜີແຜນການເຄື່ອນໄຫວໃນຕໍ່ໜ້າ.

     ໃນໄລຍະ 5 ປີຜ່ານມາແມ່ຍິງໄດ້ຮັບການຍ້ອງຍໍໃນປະເພດຕ່າງໆເຊັ່ນ: ໄດ້ຮັບໃບຍ້ອງຍໍຈາກສູນກາງສະຫະພັນແມ່ຍິງລາວຈໍານວນ 04 ສະຫາຍ ແລະ ໄດ້ຮັບໃບຊົມເຊີຍຈຳນວນ 03 ສະຫາຍ.

        ໂອກາດດຽວກັນນີ້, ສະຫາຍ ສຸລະພົນ ໝື່ນວິເສດ ເລຂາໜ່ວຍພັກຮາກຖານ ພະແນກ ວິທະຍາສາດ ແລະ ເຕັກໂນໂລຊີແຂວງ ມີຄຳເຫັນຕໍ່ກອງປະຊຸມ ຊຶ່ງສະຫາຍໄດ້ສະແດງ ຄວາມຊົມເຊີຍຕໍ່ສະມາຊິກແມ່ຍິງທຸກສະຫາຍທີ່ໄດ້ຕັ້ງໜ້າສຸມຈິດສຸມໃຈປະກອບສ່ວນເຂົ້າໃນວຽກງານຂອງຕົນເອງ ແລະ ສະຫາຍຍັງຮຽກ ຮ້ອງໃຫ້ສະມາຊິກແມ່ຍິງມີ ຄວາມກ້າສະແດງຄວາມສາມາດຂອງຕົນເອງອອກມາ, ບຸກບືນສຶກສາຄົ້ນຄວ້າຫຼັກການບໍລິຫານການນຳໃຊ້ເຂົ້າໃນການເຮັດວຽກຕົວຈິງ ແລະ ການພັດທະນາຄວາມຮູ້ ຄວາມສາມາດເພື່ອປັບປຸງຊີວິດການເປັນຢູ່ໃຫ້ດີຂຶ້ນເທື່ອລະກ້າວ.

      ໃນກອງປະຊຸມຄັ້ງນີ້ ຄະນະໜ່ວຍສະຫະພັນແມ່ຍິງຊຸດເກົ່າໄດ້ຂຶ້ນກ່າວອຳລາໜ້າທີ່, ຈາກນັ້ນຄະນະກຳມະການເລືອກຕັ້ງໄດ້ດຳເດີນການປ່ອນບັດຄັດເລືອກເອົາ ຄະນະໜ່ວຍແມ່ຍິງຊຸດໃໝ່ ຊຶ່ງຜົນຂອງການປ່ອນບັດຄັ້ງນີ້ສາມາດເລືອກໄດ້ຄະນະໜ່ວຍແມ່ຍິງຊຸດໃໝ່ປະກອບມີ: ສະຫາຍນາງ ດາວັນ ຜາງທະວົງ ເປັນປະທານ, ສະຫາຍ ນາງ ເປະ ວຽງສະຫ່ງາ ເປັນຮອງປະທານ, ທັງເປັນປະທານນກວດກາໜ່ວຍ.

      ໃນຕອນທ້າຍ ສະຫາຍ  ວິລະວັນ ດາລາສິນ ປະທານສະຫະພັນແມ່ຍິງແຂວງກໍໄດ້ໃຫ້ກຽດໂອ້ລົມ ແລະ ມີຄຳເຫັນຕໍກອງປະຊຸມ ຊຶ່ງສະຫາຍໄດ້ຍ້ອງຍໍ ຊົມເຊີຍຄະນະໜ່ວຍສະຫະພັນແມ່ຍິງຊຸດເກົ່າທີ່ໄດ້ເອົາໃຈໃສຊີ້ນຳ-ນຳພາ ແລະ ປະຕິບັດຫຼອນໜ້າທີ່ວຽກງານຫຼາຍໆດ້ານໃນໄລຍະຜ່ານມາ ແລະ ຊົມເຊີຍຕໍ່ຄະນະ ໜ່ວຍສະຫະພັນແມ່ຍິງຊຸດໃໝ່ທີ່ໄດ້ຮັບການວາງໃຈຈາກສະຫາຍສະມາຊິກແມ່ຍິງພາຍໃນພະແນກ.

      ສະຫາຍຍັງເນັ້ນໃຫ້ສະມາຊິກແມ່ຍິງທຸກສະຫາຍຝຶກຝົນຫຼໍ່ຫຼອມຕົນເອງທາງດ້ານແນວຄິດການເມືອງໃຫ້ມີຄວາມສະຫງົບ, ອຸ່ນອ່ຽງທຸ່ນທຽງ, ຫ້າວຫັນ, ມີຄວາມກ້າຫານ, ກ້າເຮັດ, ກ້າຮັບຜິດຊອບ ແລະ ສືບຕໍ່ຂະຫຍາຍມູນ ເຊື້ອຄວາມສາມັກຄີຮັກແພງເຊິ່ງກັນ ແລະ ກັນ, ຮ່ຳຮຽນເອົາບົດຮຽນທີ່ດີຂອງພະນັກງານ ນຳພາຮຸ່ນກ່ອນ ແລະ ເປັນເຈົ້າການໃນການປະຕິບັດໜ້າທີ່ ແລະ ການປະຕິບັດ ກົດລະບຽບຂອງສະຫະພັນແມ່ຍິງຢ່າງເຄັ່ງຄັດ, ເອົາໃຈໃສ່ຄົ້ນຄວ້າ ແລະ ຮໍ່າຮຽນດ້ານ ວິທະຍາສາດ ແລະ ເຕັກໂນໂລຊີຢ່າງຕໍ່ເນື່ອງ ເພື່ອປະກອບສ່ວນເຂົ້າໃນການພັດທະນາວຽກງານ ວິທະຍາສາດ ແລະ ເຕັກໂນໂລຊີ ຂອງປະເທດເຮົາໃຫ້ນັບມື້ ນັບທັນສະໄໝເທື່ອລະກ້າວ.

ບົດຂ່າວ: ລັດສະໝີ ກົມມະສິດ

ຮູບພາບ: ບຸດດີ ພົມພິທັກ

1247 1248 1249 1250 1251 1252 1253 1254 1255

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates