ຍີນ​ດີ​ຕ້ອນ​ຮັບ​ເຂົ້າ​ສູ່​ເວັບ​ໄຊ​ພະ​ແນກ ວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ ເຊກອງ

ປະຫວັດຄວາມເປັນມາຂອງ ແຂວງ ເຊກອງ

Category: ປະ​ຫວັດ​ຄວາມ​ເປັນ​ມາ​
Written by ບຸດ​ດີ

      ໃນວັນທີ 14/4/1984 ໄດ້ຮັບການແບ່ງ ແຂວງ ສາລະວັນ ອອກເປັນ 2 ແຂວງຄື: ແຂວງ ສາລະວັນ ແລະ ແຂວງ ເຊກອງ ໂດຍພາຍໃຕ້ການນຳພາຂອງອົງຄະນະພັກ ແຂວງ ເຊກອງ ແຕ່ລະລຸ້ນ-ແຕ່ລະສະໄໝ ສຶບຕໍ່ກັນມາດ້ວຍຄວາມຕັດສິນໃຈສູງ ຜ່ານຜ່າຕໍ່ອຸປະສັກຂໍ້ຫຍຸ້ງຍາກນາໆປະການເສີມຂະຫຍາຍຈິດໃຈເອກະລາດເປັນເຈົ້າຕົນເອງ ແລະ ມານະຈິດເພື່ອປະຕິວັດ ສ້າງຄວາມເຂັ້ມແຂງດ້ວຍຕົນເອງຂອງບັນດາເຜົ່າຕ່າງໆຊາວ ແຂວງ ເຊກອງເຮັດໃຫ້ ແຂວງ ເຊກອງ ບັນລຸໄດ້ຜົນສຳເລັດຫຼາຍດ້ານ ທີ່ໜ້າເພິ່ງພໍໃຈ ມີການປ່ຽນແປງ ແລະ ໂສມໜ້າໃໝ່ຫຼາຍດ້ານດີຂື້ນຢ່າງບໍ່ຢຸດຢັ້ງ.

    ວັນທີ  14/4/1984  -14/4/2016  ແຂວງ ເຊກອງ ກໍ່ມີອາຍຸ  32  ປີເຕັມ ຕະຫຼອດໄລຍະ  32 ປີທີ່ຜ່ານມາ ໂດຍພາຍໃຕ້ການນຳພາທີ່ປີຊາສາມາດ ຂອງພັກປະຊາຊົນປະຕິວັດລາວໃນນັ້ນ, ໂດຍກົງແມ່ນພາຍໃຕ້ການນຳພາຂອງອົງ ຄະນະພັກ ແຂວງ ເຊກອງສາມາດຍາດໄດ້ຜົນງານ   ແລະ   ໄຊຊະນະໃນຫຼາຍດ້ານ,  ແຂວງ ເຊກອງ ມີສະຖຽນລະພາບທາງ ດ້ານການເມືອງຢ່າງໜັກແໜ້ນ, ມີຄວາມສະຫງົບປອດໄພມີຄວາມເປັນລະບຽບຮຽບຮ້ອຍທາງດ້ານສັງຄົມເສດຖະກິດມີການຂະ ຫຍາຍຕົວຢ່າງຕໍ່ເນື່ອງຊີວິດການເປັນຢູ່ຂອງປະຊາຊົນບັນດາເຜົ່າຕ່າງໆໄດ້ຮັບການແກ້ໄຂດີຂື້ນມາຮອດປະຈຸບັນນີ້ ລວມຍອດຜະລິດ ຕະພັນພາຍໃນ(GDP) 5 ປີ ສາມາດບັນລຸໄດ້ສະເລ່ຍ 13,5% ຕໍ່ປີມູນຄ່າ GDP ສະເລ່ຍຕໍ່ຫົວຄົນບັນລຸໄດ້ 1,304 ໂດລາສະຫະລັດຕໍ່ຄົນຕໍ່ປີ ລື່ນຄາດໝາຍ 583 ໂດລາສະຫະລັດ ຕໍ່ຄົນຕໍ່ປີ (ຂອງແຜນການ 5 ປີວາງໄວ້ 750 ໂດລາສະຫະລັດຕໍ່ຄົນຕໍ່ປີ)  ໃນປີ 2015 ມີລາຍໄດ້ແຫ່ງຊາດ (GNI) 1.000 ໂດລາສະຫະລັດຕໍ່ຄົນຕໍ່ປີ ເຊີ່ງສະແດງອອກດັ່ງລຸ່ມນີ້:

        - ຂົງເຂດກະສິກໍາ-ປ່າໄມ້         ກວມ  38,0%

        - ຂົງເຂດອຸດສາຫະກຳ           ກວມ  23,5%

        - ຂົງເຂດການບໍລິຫານ           ກວມ  38,5%

    ການລົງທຶນທັງໝົດຈາກງົບປະມານຂອງລັດ, ທຶນຊ່ວຍເຫລືອລ້າ-ກູ້ຢືມ, ທຶນເອກະຊົນພາຍໃນ-ຕ່າງປະເທດ ແລະ ທຶນທະນາ ຄານ ລວມມູນຄ່າທັງໝົດ  3,641,63ຕື້ກີບເທົ່າກັບ  60% ຂອງ GDP ໃນນັ້ນ, ການລົງທຶນຂອງລັດມີ 324 ໂຄງການ,ມີມູນຄ່າ 18,642ຕື້ກີບ ກວມ 5,1%  ຂອງGDP, ທຶນຊ່ວຍເຫລືອລ້າ - ກູ້ຢືມ(ODA) ມີ 82 ໂຄງການ, ມີມູນຄ່າ 85,08 ຕື້ກີບ, ກວມເອົາ 2,3%,ທຶນເອກະຊົນພາຍໃນ - ຕ່າງປະເທດ (FDI) ມີ 49 ໂຄງການ, ມີມູນຄ່າ 13,568 ຕື້ກີບກວມເອົາ 37,3% ແລະ ສິນເຊື່ອທະນາຄານ ປະຕິບັດໄດ້ 2,013,33 ຕື້ກີບ ກວມເອົາ 55,3% ຂອງການລົງທຶນລວມ;

    ແຂວງ​ເຊ​ກອງ ຕັ້ງ​ຢູ່​ພາກ​ຕາ​ເວັນ​ອອກສຽງ​ໃຕ້ ​ຂອງ ສປປ ລາວ ມີ​ເນື້ອ​ທີ່​ທັງ​ໝົດ 7,765 ກິ​ໂລ​ຕາ​ແມັດ,ກວມ​ເອົາ 3.27% ຂອງ​ເນື້ອ​ທີ່​ທັງ​ໝົດ​ໃນ​ທົ່ວ​ປະ​ເທດລາວແຜ່ນດິນຕອນເໜືອຂອງແຂວງເຊກອງມີຊາຍແດນ​ຕິດຈອດ​ກັບ​ແຂວງສາລະ​ວັນ,ຕອນ​​ໃຕ້​ຕິດ​ກັບ​ແຂວງ ອັດ​ຕະປື ນັບແຕ່ເສັ້ນຂະໜານທີ 15° 01’ 25’-16° 15° 30” ​ເໜືອ, ດ້ານຕາ​ເວັນ​ອອກ​ມີຊາຍແດນຕິດຈອດ​ກັບ​ແຂວງ ​ເທືອທຽນ​ເຫວ້ກວາງ​ນາມ​ ແລະ ​ແຂວງ ກອນ​ຕູມ(ສສ ຫວຽດນາມ)​ເຊິ່ງມີ​ຊາຍ​ແດນ​ຮ່ວມ​ກັນ  ຍາ​ວ280ກິ​ໂລ​​ແມັດ, ດ້ານທິດຕາ​ເວັນ​ຕົກ​ມີຊາຍແດນຕິດຈອດ​ກັບ ​ແຂວງ ຈຳປາ​ສັກ ນັບແຕ່ເສັ້ນແວງທີ 106° 18’ 10”-107° 41° 30”ຕາເວັນອອກ.

   ຈຸດພິເສດທາງດ້ານທີ່ຕັ້ງ ແລະ ພູມສັນຂອງແຂວງເຊກອງ ແບ່ງອອກເປັນ3ເຂດຢ່າງ​ຈະ​ແຈ້ງຄືເຂດພູດອຍ, ເຂດພູພຽງ ແລະ ທົ່ງພຽງ ເຊິ່ງແຕ່ລະເຂດຈະມີລັກສະນະຈຸດພິເສດ ຄວາມອຸດົມສົມບູນ ທາງດ້ານຊັບພະຍາກອນທໍາມະຊາດ ແລະ ການຂະຫຍາຍ ຕົວທາງດ້ານເສດຖະກິດ-ສັງຄົມທີ່່ມີຫລາກຫລາຍ ແລະ ແຕກຕ່າງກັນ.

   ເຂດພູດອຍມີເນື້ອທີ່ປະມານ 4,665 ກມ², ເຊິ່ງກວມ​ເອົາ65%ຂອງ ​ເນື້ອ​ທີ່​ທັງ​ໝົດ​ຂອງ​ແຂວງ ເຂດພູດອຍນີ້ ໄດ້ກວມເອົາ ເນື້ອທີ່ທັງໝົດຂອງເມືອງກະລືມ,ດາກຈຶງແລະກວມເອົາກວ່າເຄີ່ງໜື່ງຂອງພື້ນທີ່ເມືອງລະມາມ, ເປັນເຂດທີ່ເຕັມໄປດ້ວຍພູຜາ ທີ່ສະ ຫລັບຊັບຊ້ອນ ສະເລ່ຍປະມານ 900-1000 ແມັດເມື່ອທຽບໃສ່ລະດັບໜ້ານໍ້າທະເລ.

   ເຂດພູພຽງມີເນື້ອທີ່ປະມານ 2,606 ກມ², ເຊິ່ງກວມ​ເອົາ 30% ຂອງ​ເນື້ອ​ທີ່​ທັງ​ໝົດ​ຂອງ​ແຂວງ ເຂດພູພຽງນີ້ໄດ້ກວມເອົາ ເນື້ອທີ່ທັງໝົດຂອງເມືອງທ່າແຕງ, ເປັນເຂດທີ່ມີຄວາມອຸດົມສົມບູນດ້ານການປູກພືດໃຫ້ໝາກ, ພືດລົ້ມລຸກ ແລະ ພືດຕະກຸນຖົ່ວ ທີ່ນໍາເອົາຄວາມຮັ່ງມີທາງດ້ານເສດຖະກິດມາໃຫ້ແຂວງເຊກອງ.

   ເຂດທົ່ງພຽງໄດ້ແກ່ທົ່ງພຽງລະມາມ, ເປັນທົ່ງພຽງນ້ອຍທີ່ຍາວຢຽດລົງໄປຕາມສອງຝັ່ງແມ່ນໍ້າເຊກອງ, ຍາວໄຫລຜ່ານເມືອງລະມາມ ແລະ ຍາວຢຽດລຽບຕາມເສັ້ນທາງເລກທີ 16(ທາງ 1 ໄອ )ເຊິ່ງມີເນື້ອທີ່ປະມານ 383,250 ກມ², ເຊິ່ງກວມ​ເອົາ5%ຂອງ​ເນື້ອ​ທີ່​ທັງ​ໝົດ​ຂອງ​ແຂວງ  ພື້ນທີ່ເຂດທົ່ງພຽງນີ້ ເປັນແຫລ່ງຜະລິດສະບຽງອາຫານທີ່ສໍາຄັນຂອງແຂວງເຊກອງ.

   ດ້ານການປົກຄອງຂອງແຂວງປະກອບມີ 4 ເມືອງ ຄື: ເມືອງລະມາມເມືອງທ່າແຕງເມືອງກະລຶມ ແລະ ເມືອງດາກ ຈຶງປະກອບມີ 200 ບ້ານໃນນີ້ມີສອງເມືອງນອນໃນ 47 ເມືອງທຸກຍາກໃນທົ່ວປະເທດ ຄື: ເມືອງດາກຈຶງ ແລະ ເມືອງກະ ລຶມເມືອງລະມາມ ເປັນເມືອງເທດສະບານຂອງແຂວງຊື່ງເປັນທີ່ຕັ້ງຂອງສໍານັກງານປົກຄອງແຂວງ ແລະ ບັນດາພະແນກການຕ່າງໆ ເປັນໃຈກາງທາງດ້ານການເມືອງ, ເສດຖະກິດ ແລະ ວັດທະນະທໍາ-ສັງຄົມຂອງແຂວງ. ມີປະຊາກອນທົ່ວແຂວງທັງໝົດ 113,200ຄົນຍິງ 54,735ຄົນ, ເທົ່າ ກັບ1.61%ຂອງຈຳນວນພົນລະເມືອງທົ່ວປະເທດ,ຄວາມໜາແໜ້ນຂອງ​ປະຊາກອນປະມານ 14.25 ຄົນ/ກມ² (ທົ່ວປະເທດ 22,2 ຄົນ/ກມ²), ອັດຕາການຂະຫຍາຍຕົວຂອງພົນລະເມືອງ 2.2% ຕໍ່ປີ ແລະ ປະກອບມີ 10 ເຜົ່າ, 95% ຂອງພົນລະເມືອງແມ່ນໜວດພາສາມອນ-ຂະແມ ­­­ແລະ ປະມານ 5% ແມ່ນໝວດໝູ່ພາສາລາວໄຕ ຈໍານວນຄົວເຮືອນ ທັງໝົດ 19,824 ຄອບຄົວ. (ຂໍ້ມູນຈາກປື້ມວາລະສານ ກອງປະຊຸມໃຫ່ຍຂອງອົງຄະນະພັກແຂວງເຊກອງ ຄັ້ງທີ IX).

 

ສ້າງຂື້ນໃນ ປີ 2015. ສະຫງວນລິຂະສິດໂດຍ: ພະແນກວິທະຍາສາດ ແລະ ເຕັກໂລຊີແຂວງເຊກອງ, ຕັ້ງຢູ່ບ້ານ ໃໝ່ຫົວເມືອງ, ເມືອງ ລະມາມ, ແຂວງ ເຊກອງ, ໂທຣ:(+856)38211646, ແຟກ:(+856)38211646
Powered by Joomla 1.7 Templates